ᐊᐅᓚᑦᓯᔨ ᖃᐅᔨᒪᔨᑕᓂᒃ ᓴᓇᒋᐊᓕᓐᓂᒃ ᐊᒻᒪ ᐊᑭᑐᔪᓂᒃ ᐸᕐᓇᐃᔨᓂᒃ

ᐊᐅᓚᑦᓯᔨ ᖃᐅᔨᒪᔨᑕᓂᒃ ᓴᓇᒋᐊᓕᓐᓂᒃ ᐊᒻᒪ ᐊᑭᑐᔪᓂᒃ ᐸᕐᓇᐃᔨᓂᒃ

ᐱᓇᓱᐊᕋᑦᓴᐅᑉ ᐃᓗᓕᖏᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᕿᓂᓕᕐᒥᔪᑦ ᐸᕐᓇᐅᑎᓕᕆᔨᒥᒃ ᐊᒻᒪ ᓯᕗᒧᑦ ᖃᓄᐃᓕᐅᕋᑦᓴᓂᒃ ᐃᓱᒪᕙᑦᑐᒥᒃ ᐱᓕᕆᔾᔪᑎᒍᑦ ᐊᐅᓚᑦᓯᔨᑦᓴᒥᒃ ᖃᐅᔨᒪᔨᑕᓂᒃ ᓴᓇᒋᐊᓕᓐᓂᒃ ᐊᒻᒪ ᐊᑭᑐᔪᓂᒃ ᐸᕐᓇᐃᔨᓂᒃ ᓯᕗᓕᖅᑎᑦᓴᒥᒃ ᓄᓇᓕᓐᓂ ᐊᐅᓚᑦᓯᔨᓄᑦ ᒪᑭᒪᑎᑦᓯᔾᔪᑎᖏᓐᓂᒃ ᐸᕐᓇᐃᓂᕐᒥᒃ, ᐊᑭᑐᔪᓂᒃ ᐱᓕᕆᐊᑦᓴᓕᕆᓂᕐᒥᑦ, ᐱᖁᑎᓂᒃ ᐊᑭᓕᓐᓂᒃ ᐊᐅᓚᑦᓯᔨᐅᓗᓂ, ᐊᒻᒪ ᐊᕐᕌᒍᒐᓴᓄᑦ ᓄᓇᓕᓐᓂ ᐱᕙᓪᓕᐊᑎᑦᓯᔾᔪᑎᒍᑦ ᐱᒋᐊᖅᑎᑕᐅᔪᑦᓴᓂᒃ. ᐅᓂᒃᑳᓕᐅᖅᑎᐅᓗᓂ ᑐᓪᓕᐊᓄᑦ ᑎᒥᐅᔪᒥᒃ ᐊᐅᓚᑦᓯᔨᒻᒪᕆᐅᑉ - ᒪᑭᒪᑎᑦᓯᔾᔪᑎᓕᕆᓂᖅ ᐊᒻᒪ ᐸᕐᓇᐅᑎᓕᕆᓂᖅ, ᐅᓇ ᓯᕗᓕᖅᑎᒻᒪᕆᒻᒧᑦ ᐱᓕᕆᐊᑦᓴᖅ ᐱᓕᕆᔨᐅᕗᖅ ᓯᕗᒧᐊᑦᑎᑦᓯᓇᓱᑉᐸᓂᒃᑯᑦ ᓄᓇᓕᐸᐅᔭᒃᑯᑦ ᐊᑭᑐᔪᓄᑦ ᑮᓇᐅᔭᐃᔭᐅᑎᑦᓴᖏᓐᓂᒃ ᑮᓇᐅᔭᓕᐅᕈᑎᐅᒍᓐᓇᖅᑐᓂᒃ, ᐱᓇᓱᐊᖅᑎᐅᓗᓂ ᐱᓕᕆᐊᑦᓴᓄᑦ ᑮᓇᐅᔭᑦᓴᓂᒃ, ᖃᐅᔨᓴᖅᑎᐅᓗᓂ ᐊᖏᔫᑎᓂᒃ ᒪᑭᒪᑎᑦᓯᔾᔪᑎᑦᓴᓂᒃ ᐱᓕᕆᐊᑦᓴᓂᒃ, ᐊᒻᒪ ᓯᕗᓕᖅᑎᐅᕙᓪᓗᓂ ᓱᓇᑐᐃᓐᓇᐃᑦ ᐱᓕᕆᔾᔪᑎᒍᑦ ᓯᕗᒧᐊᑦᓯᐊᕈᑎᑦᓴᖏᓐᓂᒃ ᐊᒻᒪ ᐊᐅᓚᑦᓯᔨᖏᑕ ᐱᓕᕆᐊᕆᕙᑦᑕᖏᓐᓂᒃ. ᐃᖅᑲᓇᐃᔮᑦᓴᑎᒍᑦ ᐊᔾᔨᐅᖏᑦᑐᒃᑯᑦ ᐋᖅᑭᑦᓱᐃᔨᐅᖃᑕᐅᒍᓐᓇᕐᓗᓂ ᓯᕗᓂᑦᑎᓐᓂ ᐊᑐᖅᑕᐅᒍᓐᓇᕋᔭᖅᑐᓂᒃ ᐃᓚᖓᓂ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ ᓄᓇᓕᖁᑎᖏᑕ.

ᑮᓇᐅᔭᓕᐊᑦᓴᐃᑦ ᐃᓗᓕᖏᑦ

• ᑮᓇᐅᔭᓕᐊᑦᓴᑦ: $154,152.67 ᐊᕐᕌᒍᓕᒫᒧᑦ

• ᐃᑲᕐᕋᖏᑦ ᐃᖅᑲᓇᐃᔮᑦᓴᐅᑉ: 35 - ᐃᑲᕐᕋᐃᑦ ᐱᓇᓱᐊᕈᓯᖅ ᐊᑕᐅᓯᕐᒥ

• ᓄᓇᓕᕐᒥᐅᑕᐅᓂᕐᒧᑦ ᐃᑲᔫᓯᐊᑦᓴᑦ: $22,378.25 ᐊᕐᕌᒍᓕᒫᒧᑦ

• ᐃᖅᑲᓇᐃᔮᑦᓴᐅᑉ ᖃᓄᐃᑦᑑᓂᖓ: ᖃᐅᑕᒫᖅᑐᖅᓯᐅᓗᓂ ᐃᖅᑲᓇᐃᔭᖅᑎᐅᖏᓐᓇᓕᕐᓗᓂ

• ᔫᓐᓂᓕᕆᔾᔪᑎᖓ: ᐃᓚᒋᔭᐅᖏᑦᑐᖅ ᔫᓐᓂᐊᓐᑯᓐᓄᑦ

ᐃᑉᐱᒋᔭᕆᐊᓕᒃ ᐱᓕᕆᔾᔪᑎᒍᑦ

• ᓯᕗᓕᖅᑎᐅᓂᖅ ᐱᕙᓪᓕᐊᑎᑦᓯᔾᔪᑎᖏᓐᓂᒃ, ᐱᒋᐊᖅᑎᑕᐅᔾᔪᑎᖏᓐᓂᒃ, ᐊᒻᒪ ᐊᐅᓚᑦᓯᔾᔪᑎᖏᓐᓂᒃ ᓄᓇᓕᐸᐅᔭᒃᑯᑦ ᐊᕐᕌᒍᒐᓴᓄᑦ ᐊᑭᑐᔪᖁᑎᖏᓐᓂᒃ ᒪᑭᒪᑎᑦᓯᔾᔪᑎᐅᔪᓂᒃ ᐊᒻᒪ ᐊᑭᑐᔪᓄᑦ ᑮᓇᐅᔭᐃᔭᐅᑎᓂᒃ ᐱᓕᕆᐊᑦᓴᖏᓐᓂᒃ.

• ᓇᓗᓇᐃᔭᐃᕙᓐᓂᖅ ᑮᓇᐅᔭᖅᑖᕕᑦᓴᓂᒃ ᐱᓕᕆᔾᔪᑎᑦᓴᓂᒃ, ᑐᑦᓯᕋᐅᑎᖏᓐᓂᒃ ᐅᐸᓗᖓᐃᔭᐃᓂᖅ, ᐊᒻᒪ ᐊᐅᓚᑦᓯᕙᓪᓗᓂ ᐅᓂᒃᑳᓕᐅᕈᑎᖏᓐᓂᒃ ᒐᕙᒪᒃᑯᓐᓂᒃ ᑮᓇᐅᔭᓂᒃ ᑐᑦᓯᕋᐅᑎᓂ ᑎᑎᕋᕆᐊᖃᖅᐸᑦᑐᓂᒃ.

• ᐊᐅᓚᑦᓯᕙᓪᓗᓂ ᐊᑭᑐᔪᓂᒃ ᐱᓕᕆᐊᑦᓴᓕᐊᑦᓴᓂᒃ ᐸᕐᓇᐃᕙᓪᓗᓂ, ᓂᐅᕐᕈᑎᓕᕆᕙᓪᓗᓂ, ᑳᓐᑐᕌᑎᒍᑦ ᐱᓕᕆᔪᓂᒃ ᐊᐅᓚᑦᓯᔨᐅᓗᓂ, ᖃᓄᖅ ᓴᓇᔭᐅᔪᑦᓴᐅᒻᒪᖔᑕ ᓱᓇᑐᐃᓐᓇᐃᑦ ᕿᒥᕐᕈᐊᖅᑎᐅᓗᓂ, ᐊᒻᒪ ᐱᓕᕆᐊᑦᓴᐃᑦ ᓯᕗᒧᐊᑉᐸᓪᓕᐊᒍᑎᖏᓐᓂᒃ ᑲᔪᓯᑎᑦᓯᔨᐅᓗᓂ ᖃᓄᐃᓕᐅᕈᑎᖏᓐᓂᒃ.

• ᐱᕙᓪᓕᐊᑎᑦᓯᔨᐅᓗᓂ ᐊᒻᒪ ᖃᐅᔨᓴᖅᑎᐅᓗᓂ ᐱᓕᕆᕝᕕᑎᒍᑦ ᐊᐅᓚᑦᓯᔾᔪᑎᐅᔪᓂᒃ ᐊᒻᒪ ᐊᑭᑐᔪᓄᑦ ᑮᓇᐅᔭᓂᒃ ᐊᑐᖅᑐᑦᓴᓕᕆᔨᐅᓗᓂ ᐊᑕᐅᑦᓯᒃᑯᑦ ᖃᐅᔨᓴᖅᐸᓪᓗᓂ ᑮᓇᐅᔭᐃᔭᐅᑎᐅᔪᓂᒃ ᐊᒻᒪ ᑮᓇᐅᔭᓕᕆᔾᔪᑎᒍᑦ ᐱᓕᕆᔾᔪᑎᐅᔪᓂᒃ.

• ᐸᕐᓇᒍᑎᒍᑦ ᓯᕗᓕᖅᑎᐅᕙᓪᓗᓂ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᑎᑦᓯᓂᒃᑯᑦ ᖃᐅᔨᓴᕐᓂᒃᑯᑦ, ᐱᓕᕆᔨᐅᔪᑦ ᐱᓕᕆᐊᑦᓴᖏᓐᓂᒃ ᐸᕐᓇᐃᓂᒃᑯᑦ, ᐱᓕᕆᐊᖃᖅᐸᓪᓕᐊᔪᓂᒃ ᐊᐅᓚᑦᓯᔨᐅᓗᓂ, ᐊᒻᒪ ᐊᐅᓚᑕᐅᔪᓂᒃ ᖃᐅᔨᓴᖅᐸᓪᓗᓂ.

• ᓇᓗᓇᐃᕐᓯᕙᓪᓗᓂ ᒪᓕᒐᐃᑦ ᒪᓕᑦᑕᐅᒋᐊᓕᐅᔪᑦ ᒪᓕᑦᑕᐅᑦᓯᐊᕋᓗᐊᕐᒪᖔᑕ, ᑐᓴᐅᒪᒍᒪᕙᑦᑐᓂᒃ ᐱᓕᕆᖃᑎᖃᖅᐸᓪᓗᓂ, ᑭᑦᑯᑐᐃᓐᓇᕐᓂᒃ ᑐᓴᐅᒪᑎᑦᓯᕙᓪᓗᓂ, ᐊᒻᒪ ᐅᓂᒃᑳᓕᐅᖅᐸᓪᓗᓂ ᑲᑎᒪᔨᓄᑦ, ᒐᕙᒪᓕᕆᔨᓄᑦ, ᐊᒻᒪ ᓄᓇᓕᓐᓂ ᑲᑐᔾᔨᖃᑕᐅᕙᑦᑐᓂᒃ.

ᐱᓕᕆᔪᓐᓇᐅᑎᐅᔪᑦ ᑎᒍᒥᐊᕆᐊᓕᐅᔪᑦ

• ᐳᖅᑐᓂᕐᓴᒥᒃ ᐱᓕᕆᔨᒻᒪᕆᐅᓂᒃᑯᑦ ᐱᔭᕇᕈᑎᖃᕆᐊᓕᒃ ᖃᐅᔨᒪᔨᑕᐅᓂᒃᑯᑦ ᓴᓇᒋᐊᓕᓐᓂᒃ ᐊᒻᒪ ᐱᓇᓱᐊᕈᓐᓇᓯᐊᕐᓗᓂ, ᐅᕝᕙᓘᓐᓃᑦ ᐊᑎᓕᐅᕐᓯᒪᓗᓂ ᐅᑯᓇᓂ, NAPEG.

• ᐊᕐᕌᒍᓄᑦ 7-ᓄᑦ ᖃᑦᓰᓐᓇᐅᓛᒃᑯᑦ ᓯᕗᓕᖅᑎᐅᓂᕐᒥᒃ ᐱᓕᕆᓕᓂᐅᒋᐊᓕᒃ ᖃᐅᔨᒪᔨᑕᐅᓂᒃᑯᑦ ᓴᓇᒋᐊᓕᓐᓂᒃ, ᓄᓇᓕᓐᓂ ᐊᐅᓚᑦᓯᔨᓄᑦ ᒪᑭᒪᑎᑦᓯᔾᔪᑎᖏᓐᓂᒃ, ᓴᓇᔪᓕᕆᓂᕐᒥᑦ, ᐅᕝᕙᓘᓐᓃᑦ ᐊᑭᑐᔪᓂᒃ ᐱᓕᕆᐊᑦᓴᓂᒃ ᐊᐅᓚᑦᓯᔨᐅᓂᒃᑯᑦ.

• ᐱᓕᕆᔨᐅᓯᒪᓗᓂ ᖃᐅᔨᓴᖅᑎᐅᓂᒃᑯᑦ ᒪᑭᒪᑎᑦᓯᔾᔪᑎᓂᒃ ᐱᓕᕆᐊᑦᓴᓕᕆᔪᓂᒃ, ᑮᓇᐅᔭᑎᒍᑦ ᐊᑐᖅᑐᑦᓴᓕᕆᓂᕐᒥᑦ, ᓂᐅᕐᕈᑎᓕᕆᓂᕐᒥᑦ, ᐊᒻᒪ ᑳᓐᑐᕋᑎᒍᑦ ᐱᓕᕆᔨᓂᒃ ᖃᐅᔨᓴᖅᑎᐅᓂᒃᑯᑦ.

• ᖃᐅᔨᒪᑦᓯᐊᕆᐊᓕᐅᔪᖅ ᓄᓇᓕᓐᓂ ᐊᐅᓚᑦᓯᔨᓄᑦ ᐊᐅᓚᑦᓯᔾᔪᑎᓂᒃ, ᐱᖁᑎᓂᒃ ᑮᓇᐅᔭᓕᐅᕈᑎᐅᒍᓐᓇᖅᑐᓂᒃ ᐊᐅᓚᑦᓯᔾᔪᑎᖏᓐᓂᒃ, ᑮᓇᐅᔭᖃᖅᑎᑕᐅᕙᑦᑐᓂᒃ ᐱᓕᕆᐊᑦᓴᓂᒃ, ᐊᒻᒪ ᒪᓕᒐᐃᑦ ᒪᓕᑦᑕᐅᒐᓗᐊᕐᒪᖔᑕ ᖃᐅᔨᓴᕈᓐᓇᓂᕐᒥᒃ.

• ᓇᓗᓇᐃᕈᓐᓇᕐᓗᓂ ᓯᕗᓕᖅᑎᐅᒍᓐᓇᕐᓂᖓᓄᑦ, ᑐᓴᐅᒪᑎᑦᓯᒍᓐᓇᕐᓂᖓᓄᑦ, ᐱᓕᕆᐊᖑᔪᓂᒃ ᑐᓴᐅᒪᒍᒪᔪᓂᒃ ᐱᓕᕆᖃᑎᖃᕐᓂᒃᑯᑦ, ᐊᒻᒪ ᐸᕐᓇᒍᑎᒍᑦ ᐸᕐᓇᐃᓂᒃᑯᑦ ᖃᓄᐃᓕᐅᕈᑎᖏᓐᓂᒃ.

• ᐊᑐᕈᓐᓇᓯᐊᖅᑐᒥᒃ ᐊᖁᑦᑐᖅᓯᐅᑎᖃᕆᐊᓕᒃ; ᐱᓕᕆᔾᔪᑎᒍᑦ ᓇᓗᓇᐃᕈᑎᖃᕆᐊᓕᒃ ᐊᒻᒪ ᓄᓇᖃᖅᑳᕐᓯᒪᔪᓄᑦ ᐅᖃᐅᓯᕐᓂᒃ ᐱᓕᒻᒪᓴᕐᓯᒪᒍᓂ ᐱᕙᓪᓕᐅᑎᒃᑲᔭᖅᑐᖅ.

ᐅᓪᓗᒥ ᐱᓇᓱᐊᖃᑕᐅᒋᑦ

ᐱᓕᕆᓕᓂᐅᑦᓯᐊᕈᕕᑦ ᖃᐅᔨᒪᔨᑕᐅᓂᒃᑯᑦ ᓴᓇᒋᐊᓕᓐᓂᒃ ᓯᕗᓕᖅᑎᐅᓂᒃᑯᑦ ᐱᓕᕆᐊᖃᕈᒻᒪᐅᓗᑎᑦ ᒪᑭᒪᑎᑦᓯᔾᔪᑎᒍᑦ ᐱᕙᓪᓕᐊᑎᑦᓯᓂᕐᒥᒃ, ᐸᕐᓇᒍᑎᒍᑦ ᐸᕐᓇᐃᖃᑕᐅᓂᕐᒥᑦ, ᐊᒻᒪ ᓄᓇᓕᓐᓂᒃ ᐊᑦᑐᐃᑎᑦᓯᓂᒃᑯᑦ, ᐊᔭᐅᖅᑕᐅᕗᓯ ᐱᓇᓱᐊᖁᔭᐅᓗᓯ ᐃᖅᑲᓇᐃᔮᑦᓴᒥᒃ.

ᐅᕙᑦᑎᓐᓄᑦ ᐱᖃᑕᐅᒋᑦᓯ ᐱᕈᐃᕙᓪᓕᐊᖃᑕᐅᕙᓪᓗᓯ ᓯᕗᓂᑦᓴᖓᓄᑦ ᑲᓇᑕᐅᑉ ᐅᑭᐅᖅᑕᖅᑐᒥ ᐊᖏᔪᖅᑳᖃᕐᕕᐊᑕ.

ᒪᓕᑦᑐᒋᑦ ᐋᑎᑯ 23-ᒥ ᑎᑎᕋᕐᓯᒪᔪᑦ ᓄᓇᕘᒧᑦ ᓄᓇᑖᕈᑎᐅᓯᒪᔪᖅ ᐊᖏᕈᑎᒥ, ᓯᕗᓪᓕᐅᑎᑕᐅᓂᐊᖅᑐᑦ ᓄᓇᕘᒧᑦ ᓄᓇᑖᕈᑎᐅᓯᒪᔪᖅ ᐊᖏᕈᑎᒥ ᐊᑎᖃᖃᑕᐅᔪᑦ ᒪᓕᒐᕐᓂᒃ ᐊᑐᕈᓐᓇᖅᑐᑦ.